Mani Pulitik, Kukut Sintaki Duitnya Jangan Pilih Urangnya - ISP68

Xticker

Merangkai Kata Merajut Asa

Klik atau Tekan Saja Foto di Bawah Ini Untuk Pemesanan Langsung
Klik atau Tekan Saja Foto di Bawah Ini Untuk Pemesanan Langsung

Minggu, 15 November 2020

Mani Pulitik, Kukut Sintaki Duitnya Jangan Pilih Urangnya

Ampun maap, naya lainan barita tagal tulisan lapas manurut pikiran atawa dadangaran nang manulis. 

-----------------

"Tambahi lagi, banyaki bawa wan kadut-kadutnya tatap ai aku kada mamilih Pambakal Tuha nintu," ujar Ihin sambilan ma'ambul akan kukus ruku.

Basungsungan sudah bubuhannya maruming di warung Acil Imai di Pasar Ahat. Siapa lagi amun kada lain bubuhan Ihin, Ihat wan Uhir.

"Haw, dimapa maka kaya nintu, duit urang ditarima tagal urangnya kada dipilih ?" takun Uhir.

"Biar haja. Urang nang katuju babari duit maraga handak jabatan nintu dijarai supaya kadada lagi nang sambatan mani pulitik," sahut Ihin lakun panahunya nintu.

"Kada paham nah ujar ikam mani pulitik nintu, cuba am jalas akan," pinta Uhir.

Baluman dijawap Ihin datang am Amang Igup sambilan manjinting kantungan karisik nang pinanya baisian taruk wan iwak. Amang Igup umpat am bagabung jua di warung Acil Imai.

"Ayu am Cil ulah akan aku banyu kupi kaya biasa, rasa karing rakungan imbah raun di pasar bacari taruk wan iwak," ujar Amang Igup ka Acil Imai.

"Ai Amang kanapa pian nang batutukar ka pasar, Acil di rumah kamana ?" Ihat manakuni Amang Igup.

"Acil ikam ada haja, tagal kulir banar ai ka pasar, kulir kaluar rumah aur bapuruk maskar wan babasuh tangan," sahut Amang Igup.

"Damintu kah, ulun kira garing sidin," ujar Ihat.

Acil Imai manyurung kupi ka Amang Igup. Kupi panas, ma'ambul masih kukusnya, Amang Igup mahadangi tadingin dulu, sidin malikit ruku.

"Napa am nang handak bubuhan ikam pandir akan timpulu aku ada naya ?" takun Amang Igup.

"Anu mang ai....mani pulitik nintu apa maksutnya ulun kada paham," ujar Uhir.

Amang Igup manuang kupi ka pipiringan halus, maniup-niup supaya dingin, balalu mahirup.

"Han....tanyaman bapikir amun imbah kupi masuk ka rakungan. Mani pulitik nintu istilah urang gasan mamadah akan urang nang handak dapat jabatan misal handak jadi pambakal tagal babari duit atawa mahambur duit ka urang banyak supaya mamilih," Amang Igup manarang akan.

"Nang kaya Pambakal Tuha tu pinanya lah Mang. Anak buah sidin kasana kamari mahaga rumah warga manjulung duit," sahut Ihin.

"Iya ai pinanya nang kaya nintu pang. Babagi duit 150 ribu rupiah saban ikungan dapat tamasuk ai Ihin jua manarima, hahaha.......," Ihat umpat manyahut sakaligus manyindir Ihin.

"Nah bujuran ujar bubuhan ikam nintu. Nang kaya Pambakal Tuha nintu ngarannya mani pulitik. Kacak, kukut, sintak duitnya tagal jangan dipilih urangnya," ujar Amang Igup.

"Akur ulun wan Amang Igup. Kita ambili haja barata'an duitnya imbah nintu kaina kita barata'an mamilih Calun Pambakal nang lain haja," ujar Ihat.

Bubuhannya taparukui pinanya wan Amang Igup masa'alah mani pulitik; ambili duitnya kada mamilih urang nang mambari.

"Dimapa am amun dijukungi tapih wan kakamban, Mang ?" Acil Imai umpat basuara matan dalam warung.

"Ambil haja jua Cil ai. Kada papa, tapuh wan kakamban nintu kawa gasan sambahiyang wan ka urang bakarismin. Bulih haja amun sahibar babari tapih wan kakamban; kada malanggar aturan, lainan amun babari duit nang nilainya kada bulih malabihi 60 ribu rupiah," jawab Amang Igup.

"Syukur ai amun damintu, aku kaina mamilih kakanya Pambakal Anum haja. Sidin masih anum jua, gagah, tapintar bapikir. Amun nang tuha tu sudah samustinya pansiun maharungi cucu wan mamicik tasbih haja," ujar Acil Imai.

"Akur........Kita barata'an mamilih kaka Pambakal Anum.....!!!" bubuhannya satangah kuciak sambilan ma'angkat jari talunjuk. (ISP)

--------------------------------------

*Perhatian : Penulis tak menyediakan terjemahan tulisan di atas, silakan belajar Bahasa Banjar ke tetangga, teman, maupun kenalan Anda yang orang Banjar.


Tidak ada komentar:

Posting Komentar

Komentar singkat & padat.
Tak bernuansa SARA.
Tak membully.