Bahiri Maraga Kada Dapat BLT wan Sambako - ISP68

Xticker

Merangkai Kata Merajut Asa

Klik atau Tekan Saja Foto di Bawah Ini Untuk Pemesanan Langsung
Klik atau Tekan Saja Foto di Bawah Ini Untuk Pemesanan Langsung

Kamis, 14 Mei 2020

Bahiri Maraga Kada Dapat BLT wan Sambako

Naya sahibar kisah bubuhan pawaluhan haja pang nang badudukan di warung sakadup ampun Amang Tiung nang buka bajualan di bulan puasa di pasar Ahad.

Takumpulan bubuhannya nang kada pati pamuasa. Mangupi sidin ai sambilan ma'ambul kukus ruku, takuhup palak. Ada si Uhir nang gawiannya imbah anu ada imbah anu parai alias bagawi sarabutan. Talihat ada jua Ihin, naya pang gawian manatap haja; jaga malam di pasar Ahad. Taumpat takajal jua Ihat nang gawian saban hari bacari kutak kardus wan butul bakas gaduk gasan dijual pulang.

Kada sa'apa lawas bangsul Amang Idah (sabujurnya Dahlan). Sidin naya tamasuk urang nang dimalui bubuhan tarkul di pasar Ahad, tagal sidin ni baikan rahat mambayari akan makan minum bubuhannya.

"Haw lah sudah takumpulan majelis pabuka'an," tagur Amang Idah sambil baduduk.

"Iya am nah mang ai, kadada nang digawi wan jua kada puasa," sahut Uhir.

"Cah ikam nintu mudus haja jua, dasar kada pamuasa," balas Amang Idah sambilan tatawa, nang lain gin umpatan manawa akan Uhir.

"Napa nih nang dipandir akan tadi kudangar pina barucau ? takun Amang Idah.

"Anu mang ai.....kisah banyak urang nang kada tahaga wan kada tadapat BLT pang," ujar Ihin.

"Inggih mang ai. Banyak nang mangaku kada dapat. Hiran jua, amun handak wayah Pemilu jangan nang hidup nang mati-mati gin ai tabuat di daptar," Ihad umpat manyahut.

'Nah ikam am. Pemilu nintu kada sama wan nang kita hadapi naya, kuruna atawa Covid-19. Amun di Pemilu nintu nang mambari Sambako atawa duit lainan duit Pamarintah tagal duit saurang alias duit paribadi, wan jua ada hasil nang handak didapat si pambari ya itu dapat suara pamilih," Amang Idah manjalas akan.

"banyak nang nyata-nyata miskin iya itu kada dapat BLT alahan nang dapat nang pina talihat nyaman hidupnya," ujar Uhir.

"Nah parkara nintu, nang kada dapat BLT itu maraga kada atawa baluman tadaptar haja. Data nang lawas baluman dihanyari, jadinya nang dapat tatap haja urangnya nang tabuat di daptar tadahulu. Salang nang kada atawa balum dapat nintu pinanya urang nang hanyar miskin tahun ini," ujar Amang Idah lagi.

"Turui banar am amun kaya naya, sudah kada tadapat BLT, kada dapat Sambako ha pulang. Babarapa hari tadi rami urang dapat pambagian Sambako datang H. Udi nang Angguta DPRD nintu," ungkai Ihad.

"Kada usah bahiri wan nang dapat Sambako. Bisa haja Sambako nang dibagi H. Udi nintu gasan urang-urang nang dahulu mamilih sidin maka sidin duduk di DPRD. Ikam haja gin ai balum tantu umpat mamilih H. Udi," sahut Amang Idah sambilan manjumput ruku balalu malikit.

"Inggih bujuran tu mang ai. Saurang haja kada umpat mamilih H. Udi waktu Pemilu maka handak jua tadapat Sambako, mambari supan. Tasarah sidin ai handak mambari siapakah maraganya duit sidin jua," umpat manyahuti Ihin.

"Bahiri tu kada baik tuh ai. Rajakinya tu datang matan Tuhan. Amun dasar rajaki saurang pacang kada ta ka urang pang. H. Udi nintu sidin babagi Sambako gasan pamilih sidin, wajar haja sidin handak maulah himung pamilih supaya sidin kada dikuya kada ingat pas sudah duduk nyaman di DPRD," Amang Idah manjalas akan.

"Inggih pang. Artinya urang kaya H. Udi nintu katahuan ingat haja wan bubuhan pamilih sidin, wan kawa haja tu kaina dipilih pulang amun Pemilu.

"Sudah gin ai, sudah kada puasa manguya urang ha pulang, baik talah akan kupi tu nah, tu ruku diisap jangan habis kana angin budas," ujar Amang Idah.

Pukuknya amun sudah takumpulan bubuhan nintu di warung Amang Tiung rami tu pang barucau. Kadada jua nang pacangan wani managur, maraganya amun ditagur gin mantul jua, hehehe........

-&-&-&-&-&-&-&-&-&-&-&-&-


*Ampun maap kada pakai panarjamah, baluman diulah akan ulih Google, tarjamah akan haja saurang. Wan ampun maap jua amun ada ngaran, andakan wadah, atawa sasama'an kaya naya kisahnya ba'arti kabulujuran haja tu.

4 komentar:

  1. Keren ceritanya, asa mandangarakan langsung datang warung. Tapi ada pang beberapa kata nang ulun kada tahu artinya. Mudahan ulun kawa jua maumpati pian baulah tulisan dalam bahasa banjar.

    BalasHapus
  2. Balasan
    1. pasti kita tambahi amun ada haja masih nang dikaut di padaringan, hehehe.......

      Hapus

Komentar singkat & padat.
Tak bernuansa SARA.
Tak membully.