Kada Parcaya Kuruna Lagi

foto : telusur.co.id

"Amun manantang tu kada pang, tagal aku sudah kada parcaya lagi wan nang bangaran Kuruna (Corona) nintu, parai dustainya wara ai," ujar Amang Igup satangah sangit sidin imbah ditagur patugas kada mamakai maskar (masker) rahatan batutukar taruk wan iwak di pasar disuruh bini sidin baisukan tadi.

"Sabar wan santai haja Mang ai. Sini bawa mangupi hulu supaya nyaman jua rakungan wan dingin kapala," ujar Acil Imai nang bawarungan di Pasar Ahad.

Amang Igup balalu singgah wan duduk di warung Acil Imai mamasan kupi hirang. Kabulujuran di warung nintu rahatan takumpulan jua bubuhan kanakan pasar nang jadi langganan tatap Acil Imai; ada Ihat, Ihin, wan Uhir.

"Ulun Mang ai hanyar hakun parcaya wan Kuruna nintu amun bubuhan urang banyak ka pasaran nintu balalu raum, tang rabahan ngalih bahinak, kusur-kusur atawa kalapak-kalapak kaya ayam imbah disumbalih," ujar Ihat.

"Ikam tu pasti suah talihat pidiu (video) nang di Wuhan Cina nintu kalu lah waktu si Kuruna nintu pamula'an dihabar akan ?" takun Uhir.

"Nah nintu am, nang ma'ulah urang banyak gair wan takutan wan Kuruna asalnya," sahut Ihat.

"Sama Mang ai ulun gin ai sudah kada parcaya lagi wan si Kuruna nintu. Nang dihabar akan mati nintu gin ai balum tantu takana Kuruna, bisa haja maraga panyakit lain tagal dipadah akan takana Kuruna jua," Ihin umpat jua ba'ungap.

"Kamana garang Acil maka pian nang ka pasar batutukar Mang ?" takun Ihat ka Amang Igup nang rahatan manuang kupi panas ka piringan halus.

"Ada ai Acil ikam di rumah, tagal inya kada nyaman awak, galitiran mariyap dingin, pinanya imbah bahujan samalam pang datang di palabuhan manukar iwak," sahut Amang Igup.

"Uh.....damintu kah, mudahan ai awak galitiran mariyap dingin nintu kadada nang manyambat takana Kuruna," ujar Ihin.

"Kada kalu, Acil ikam tu rahat haja jua sudah kaya itu amun takana banyu hujan," ujar Amang Igup balalu malikit ka ruku, ma'isap, ma'ambul kukus.

Wayah naya salawas dipadah akan disarang Kuruna ni di pasar di'andaki wadah banyu ganal sambatannya tandun gasan babasuh tangan, disadia akan jua sabunnya, saban ikungan urang disuruh bapakai maskar; nang bajualan atawa jua nang batutukar sama musti pakai maskar nintu. Ujar bubuhan pajabat; paratukul kasihatan, sabarata'an, sadunia'an musti mana'ati nang ngaran paratukul kasihatan nintu.

"Untung haja pian tadi ditagur kada disuruh bulik ulih patugas. Kadada jua pinanya mambari maskar patugas nang managur tadi Mang ?" takun Uhir.

"Parai, managur haja bisanya, mustinya dibari maskar amun urang kada pakai maskar, duit anggarannya maka am liwar banyak baratus milyar gasan Kuruna naya," sahut Amang Igup masih talihat sangkal.

"Hiran jua ulun wan Kuruna naya, ujar urang nang tahu Kuruna nintu manyarang pahinakan. Padahal nang ba'isi pahinakan nintu kan kada kita manusia haja, ayam, itik, kucing, kambing, sapi, hadangan, hadupan gin ai bahinak jua barata'an kanapa kada tahaga Kuruna, wan jua bubuhan binatang nintu kada dipasangi maskar," ujar Ihat.

"Nah bujuran nintu, satuju aku. Urang gila pang kada tadangar takana Kuruna, padahal kada karuan makan, minum, guring, mandi, wan sambarangan haja bamamakan wan minum," sahut Ihin.

"Sudah gin ai bubuhannya ai, pinanya kita barata'an naya musti nang kaya urang gila supaya kada tahaga wan takana Kuruna. Salawas Kuruna naya kita ni sudah dipadah akan kaya urang gila, makanya am ada istilah 'new normal'," ujar Amang Igup.

"Napa ti artinya 'new normal' nintu Mang ?" takun Uhir.

"Dangar akan bujur-bujur barata'an aku manjalas akan napa nintu istilah 'new normal'. Nintu kan basa Inggris; new naya artinya hanyar, normal naya artinya waras. Nah amun digabung jadi new normal artinya hanyar waras; ba'arti imbah gila, liwar.......," ujar Amang Igup ta'uling.

"Hah ! Kita naya imbah gila," Ihat, Ihin, Uhir baimbai ba'ucap.

Di warung Acil Imai nintu kada Amang Igup, Ihat, Ihin wan Uhir haja, tagal ada jua si Jarwo wan Unding. Si Jarwo naya tukang babarasih pasar, Unding naya panjaga malam. Maraga urang badua nintu kada pati paham basa Banjar makanya bahinip kada kawa umpat bapandir.

"Ngomong opo wong-wong iki, ora mudheng aku," garunum Jarwo.

"Bicara aga je pale' ya maneng tau iye na teppu-teppu Kuruna," Unding bingung.

"Baranai bubuhan ikam badua kalu pina ku lapau. Makanya amun di banua urang nintu balajar basa urang kampung jangan basa saurang haja disurung," sarik Uhir mandangar garunuman Jarwo wan Unding.

Balalu hinip am nang badua nintu maliha Uhir sarik wan bamamai.

"Sudah, sudah gin kada usah bahual. Aku sudah imbah, handak bulik, hitungi barata'an napa-napa tadi nang bubuhan ikam tumbas biar kutahuri barata'an," ujar Amang Igup sambilan mancaluk salipi.

"Tarimakasih Mang lah, rancaki haja pian ka warung Acil Imai naya, jangan jara manahuri bubuhan kami," ujar Ihat. (ISP)

--------------------------------------

*Perhatian : Penulis tak menyediakan terjemahan tulisan di atas, silakan belajar Bahasa Banjar ke tetangga, teman, maupun kenalan Anda yang orang Banjar.