.jpg "Andrean Atma Maulani")
.jpg "Abdul Rahim")
.jpg "Nur Khalifah")
.jpg "Suwignyo")
Babarapa minggu ni Tamrin wan kakawalannya bagadang kada baguguringan, napa hajat ?
Pukuknya amun siang bubuhannya guringan, bangun malandau. Imbah tangah ari hanyar bangunan, kaluncatan bacari nasi dingin di tatudung atawa manggarungkap panci di padu.
Amun mulai bamula ari malam, asing-asingnya bacari tatamba supaya kada mangantuk, tahan bagadang bamamalaman.
Sakali pas disalidik, bubuhannya itu bagadang saban malam gasan manuntun urang main sipakbal di tipi, paraduan main sipakbal di banua biru jar, sambatannya Euro 2012, hehehe……….
Liwar tugulnya bubuhannya nitu, apalagi Tamrin nang katuju banar wan Timnas Jarman (Jerman maksudnya). Pukuknya amun imbah taduduk dimuka tipi manuntun Timnas Jarman, biar bakal mintuha gin ai manggawil pasti kada tahirani, hahaha………
“Malaman samalam unda kada kawa talihat sipakbal di tipi,” ujar Uhau.
“Nangapa tih jadi kada kawa ?” takun Tamrin.
“Napang amun siaran tipi di wadahku diacak, kada talihat gambarnya sahimpil-himpil,” sahut Uhau.
“Ngalih ai amun umpat mangait wadah urang jua, amun kada ba-astilah manukar antina parabula saurang,” manyahuti Tamrin.
Bubuhan kakanakan di kampung nitu biar tajauh bagana pada kuta, tapi am sudah tahu banar jua nang ngaran acara tipi nang rami, tamasuk paraduan main sipakbal.
Maka bubuhannya kada sahibar manuntun, tapi ada jua nang bataruh. Kada pang amun bagaganalan taruh, ada nang bataruh sabungkus ruku, ada jua nang bataruh bayar sarapan katupat isuk baisukan, nitu gin amun bangun kada malandau.
“Malam kaina unda dangar bubuhan patugas PLN handak mamasang layar ganal gasan manuntun sipakbal di tipi,” habar Tamrin wan kakawalannya.
“Nah am mantap tu, baik kita kasanaan haja malam kaina, nyata nahap banar gambarnya amun layar ganal,” sahut Husni sasambilan manguit gigi imbah kasulitan tulang iwak papuyu.
“Ayu ai amun kaya itu kita barataan kasana haja malam kaina, kita batamuan di warung Acil Juhai haja,” ujar Tamrin.
Jangan dikira bubuhan urang kuta haja nang katuju manuntun sipakbal Euro 2012, urang kampung nang kaya bubuhan Tamrin wan kakawalannya gin ai katuju jua. Padahal suruh ja main sipakbal baluman tantu bisa, bukah haja manggah bakukus bumbunan.
