SELAMAT DATANG DAN BERKUNJUNG DI ISP 68 BLOG
Biar Balapor ka Jibril Tatap ai Kalah - ISP68

Xticker

Merangkai Kata Merajut Asa

Definition List

   # 

Jumat, 28 Juni 2019

Biar Balapor ka Jibril Tatap ai Kalah

"Amun dasar kalah biar melapor wan ba-adu-adu ke malaikat Jibril gin ai tetap ai kalah," ujar Kai Akup sambilan tatawa, manawaa akan nang kada terima kalah.

"Liwar bujuran tu Kai ai, ulun sependapat wan pian. Kesana kemari mamadahkan ada nang baculas, sudah ditanggapi wan disidang segala macam kaputingannya tetap ai ditolak wan kalah," sahut Amang Bakri.

Courtesy : inilahcom

Takumpulan pulang bubuhannya di warung Acil Ijum imbah tadi malam menonton putusan MK Nomor 01/PHPU-PRES/XVII/2019, nang menolak gugatan kubu 02. Hapuk am, sintup am barataan nang katuju mamadahkan Pemilu wan Pilpres culas. Rami bubuhan karacak bihi maruming lagi, nang himung jelas Acil Ijum warung sidin jadi rami; kopi, teh, gaguduh, untuk, baulu, gagampam, jua roko jadi payu, hahaha.......

"Untung aku semalam menyucuk 01 jadi taumpat manang jua," ujar Utuh Tingil kahimungan.

"Cah ikam tu Tuh ai caka kada dijulungi duit ojek gin ai bisa kada tulak ke TPS, waluh jua ikam ni," hingkak Amat Waluh.

"Ikam tu nang waluh, waluh basumap ha pulang, ikam disuruh H. Idrak mencari orang nang hakun memilih sidin malah duitnya ikam kajal ke salipi ikam saurang, tu nah H. Idrak liwar bamamai imbah tahu, hayu lah ikam amun sampai batamuan sidin, bisa-bisa dikibang sidin ikam wan parang bungkul apalagi sidin kada tapilih," sahut Amat Waluh, pucat ka tahi-tahi am Utuh Tingil dapatnya, sintup langsung.

"Sudah gin ai kada usah lagi bahualan, apa haja nang sudah jadi keputusan MK nintu musti kita terima barataan; nang manang jangan ungah, nang kalah apalagi kada usah sangkal. Kita rakat haja pulang barataan, hadangi Pemilu kaina umpat bacalon lagi," ujar Kai Akup mamadahi bubuhannya.

"Inggih Kai ai. Bahualan bahimat kada pacang jadi baras jua lagi, mahadang 5 tahun pulang pacang tadapat Pemilu, hehehe......" Amang Bakri manyahuti.

"Kada sarana mahadangi Pemilu Amang Bakri ai, parak ai sudah nang dihadap ni pemilihan Bupati di 2020 kaina, pacang banyak pulang nang bahambur baju kaos, almanak, satikar, sapanduk, balihu, sambako wan duit-duitnya, pacangan ada pulang nang cair, hahaha....." Amat Tingil sakali baucap bujuran, pinanya baluman kemasukan gaduk.

"Nah, bujuran tu Mat ai ujar ikam. Tagal ingat akan bila kaina memilih Bupati; pilih nang bujur-bujur ketahuan sakulahnya, perhatian wan masyarakat, jangan nang pura-pura perhatian wayah handak jadi haja, pas kaina sudah tapilih; lawang rumah haja kada suah tabuka amun handak di-ilangi," Kai Akup bapasan.

"Kada kurigi-rigi Kai ai memilih nang kada jelas sakulahnya, apalagi nang liwar pangasit bin pamalar bin jadam, takurihing haja pina ngalih alahan lagi mauluri duit," han Amang Bakri sakali mau baucap, liwar sidin ni.

"Sudah gin ai, sadang dihitung napa-napa tadi nang ditungap biar kubayari barataan, kabulujuran tadi aku tadapat Hadran mambari duit maraga kahimungan 01 manang, satumat lagi orang sambahiyang jumat sadang bulik mandian atau ba'udu," Kai Akup mangaluar akan duit kalir habang salambar. (ISP)