Sugih Bakajut Imbah Kuruna Ampihan

Ampun maap, naya lainan barita tagal tulisan lapas manurut pikiran atawa dadangaran nang manulis. 

-----------------

paramisi, gambar ampun Kompas

"Parasaku imbah ampihan Kuruna ni kaina ada nang sugih bakajut," ujar Ihat mambuka kisah.

"Haw, kisah napa ti Hat maka tasambat ada nang sugih bakajut ?" takun Uhir nang sambut saluangan.

Ihat kada langsung manjawap tagal mambibit ruku balalu malikit.
Naya kisah di warung Acil Imai di Pasar Ahad, wadah bubuhannya rahat dudukan mangupi sambil barucau macam-macam matan kisah pulitik sampai mangisah akan urang bajual itik.

"Anu Hir ai, aku mandangar urang jua bapandir. Ujar urang nintu imbah Kuruna ni ampihan kadada lagi, ada nang pacangan sugih bakajut atawa duitnya batambah banyak," ujar Ihat sambil ma'ambul kukus ruku.

"Dimapa tih bisa macam nintu, ayu pang kisah akan sampai habis-habis biar kita barata'an nang ada niya paham," sahut Ihin nang matan tadi kada sing tuntungan manungap mi guring.

"Damiya kisahnya. Pasang barata'an talingan bubuhan ikam," ujar Ihat.

Adanya Kuruna atawa ngarannya COVID-19 niya pacangan banyak mahabis akan duit pamarintah. Baratus-ratus milyar duit pacangan tabuang wara gasan manukar macam-amcam alat palindung diri atawa APD, ujutnya ada maskar (masker), rapit tis (rapid test), han sanitisir (hand sanitizer), PCR, pis sil (face shield), disinpiktan (disinfektan), sabun, sampai banyu gasan babasuh tangan.

Klik atau Tekan Saja Foto di Bawah Ini Untuk Pemesanan Langsung

"Wah, wah....banyak jua lih tutukaran gasan Kuruna niya," ujar Uhir.

"Nintu ditukar wan duit sabarata'an lah Hat ?" takun Ihin.

"Nyata ai wan duit kada wan daun jawau atawa daun nangka alahan kalaras pisang," sahut Ihat muar wan takunan Ihin.

Maskar nintu kabanyakan ditukar gasan sakali pakai haja, imbah nintu kada bulih dipakai tatarusan, musti disalukut kada bulih dibuang babarang timbai maraganya jar maskar nintu bisa ada pirus nang bisa manjangkiti urang.
Maskar nintu kada ditukar baratus banyaknya tagal puluhan ribu, niya barapa duit tabuang gasan maskar haja.

"Barapa haraga maskar tu sabutingnya Hat ?" takun Uhir.

"Satahu aku haraganya balarang waktu nang pamula'an Kuruna nintu, maraganya balarang barangnya ngalih cacariannya. Waktu pamula'an nintu aku suah manukar haraganya Rp 25 ribu tagal maskar nang kutukar nintu dulu nang baik pang. Imbah nintu maraga ada panjahit kampung nang bisa ba'ulah maskar, haraganya jadi bamurah; Rp 6 ribu sabutingnya," jawap Ihat.

Anda perlu mencetak spanduk, baliho, banner, bermacam stiker, bikin ID Card, sablon & lainnya, klik foto ini untuk pesan
"Amun haraga alat rapit tis nintu pang barapa'an jua jar ?" takun Uhir.

"Nah amun alat niya pang satahu aku dulu haraganya pamula'an tu Rp 450 ribu, kalawasan baturun jadi sakitar Rp 200 ribuan lalabih lah," ujar Ihat.

Uhir wan Ihin hanyar am handak batakun tagal kabulujuran Amang Igup datang umpat bagabung ka warung Acil Imai. Amang Igup naya tamasuk tutuha'an di Pasar Ahad nang ditakutani bubuhan tarkul pasar.

"Akayah basungsungan bubuhannya ni sudah mamandir akan masa'alah Kuruna, sudah jua kah mandian," ujar Amang Igup.

"Sudah batimpungasan barata'an Mang ai," sahut bubuhannya batitiga.

"Napa tih timanya pamandiran ba'isukan naya ?" takun Amang Igup.

Anda perlu mebel yang ramah di kantong tapi kualitas bagus, klik foto ini untuk pesan


"Timanya Mang ai sugih bakajut maraga Kuruna," ujar Ihat nang ampun kisah pamula'an.

Manurut ujar Amang Igup; salain pamarintah nang manukar maskar wan babarapa alat gasan manangat Kuruna nintu manjangkit, banyak jua nang asalnya matan sumbangan bubuhan pangusaha nang baduit jua parusaha'an. Jadi kada tunggal duit pamarintah haja.

"Bursiah alat-alat sumbangan nintu dimasuk akan uknum jua ka anggaran gasan Kuruna nintu lah Mang, kisah manukar pakai duit anggaran padahal sumbangan urang ?" Uhir mamancing Amang Igup.

"Bisa haja damintu mana kita tahu amun ada uknum ma'ambil kasampatan timpulu dapat paluang," sahut Amang Igup.

"Amun misalnya mamain akan haraga pang bisa haja jua kalu lih Mang. Ini misal haja pang, haraga maskar nang Rp 6 ribu nintu diulah jadi haraga misal Rp 10 ribu, atawa haraga alat rapit tis nintu disama ratakan haja manjadi Rp 450 ribu padahal haraganya kada sa'itu lagi tagal bamurah sudah ?" giliran Ihin pulang mamancing Amang Igup.

"Kada manutup kamungkinan bisa jua haja kaya itu, tagal itu uknum pang, kita kada manuduh pamarintah nang ba'ikar tagal ada uknumnya nang bisa damintu," ujar Amang Igup balalu mamasan kupi hirang ka Acil Imai.

"Tagal amun ada uknum nang bisa ba'ikar damintu kaina kan ada pamariksa'an BPK atawa KPK Mang ai bisa-bisa katahuan," ujar Ihat.

"Cah nintu amun BPK wan KPK kawa mambukti akan, amun kadada barangnya lagi pang mana kawa mambukti akan," sahut Amang Igup sambil bakitar duduk mahadap ampah ka bubuhannya.

Amang Igup balalu manjalas akan ka bubuhannya nang batiga nintu.
Ujar Amang Igup, naya pandapat Amang Igup pang; sabarata'an alat nang ditukar gasan Kuruna nintu imbah dipakai musti dimusnah akan kada babakas maraganya dianggap babahaya ada ba'pirus nang bisa manjangkiti siapa haja.

"Dimapa am BPK wan KPK handak mancari bukti amun sarabanya dimusnah akan kadada lalu babakasnya, pikir akan ha bubuhan ikam," ujar Amang Igup balalu mahirup kupi sidin.

"Masuk di akal jua ujar pian nintu Mang ai amun kaya itu parigalnya," ujar Uhir.

"Bah pacang balauk ganal am uknum nang kawa main disitu," sahut Ihin.

"Nah, sasuai haja kalu ujar aku pacangan ada kaina nang sugih bakajut atawa batambah duitnya imbah Kuruna naya ampihan," ujar Ihat lihum.

"Amun aku tasarah haja bila ada jua uknum nang ba'ikar damintu, inya jua kaina nang manyandang dusanya di ahirat, kita naya hidup kada pacang salawasan, pacang mati barata'an, ingat badusa amun mambunguli urang alahan lagi nang dibunguli nintu urang sa banua'an," Amang Igup mancaramahi bubuhannya nang batiga.

"Sudah gin ai pamandiran kita ba'isukan naya, aku handak mancari umpan hulu gasan ma'unjun di palabuhan kalu pina kulihan iwak babara'an," ujar Amang Igup sambil mancaluk salipi balalu mambayar minuman sidin sakaligus minuman bubuhannya. (ISP)

--------------------------------------

*Perhatian : Penulis tak menyediakan terjemahan tulisan di atas, silakan belajar Bahasa Banjar ke tetangga, teman, maupun kenalan Anda yang orang Banjar.