SELAMAT DATANG DAN BERKUNJUNG DI ISP 68 BLOG
Babuang Duit Manukar Maskar Sakali Puruk Dibuang - ISP68

Xticker

Merangkai Kata Merajut Asa

Definition List

   # 

Minggu, 09 Agustus 2020

Babuang Duit Manukar Maskar Sakali Puruk Dibuang

ampun maap mamakai gambar ampun ayosemarang
"Siapa haja nang manyumbang nintu wan apa haja nang disumbang akan nintu asalkan baguna gasan urang banyak pasti baik, tagal masa'alah pas wan kadanya haja lagi," ujar Uhir parahatan takumpulan Ihad wan Ihin di warung Acil Imai.

"Bapandir tu batujuan Hir ai jangan nang kaya kalayangan pagat," tagur Ihad.

"Kada pang, pandiranku naya pasti batujuan. Aku handak mangisah urang sugih nang manyumbang banyak liwar maskar gasan kuruna. Bararatus juta gasan manukar maskar haja imbah nintu dibagi akan garatis ka masarakat," sahut Uhir.

"Aku tahu haja urang sugih nang ikam kisah nintu," umpat manyahuti jua Ihin sambil takarinyum.

Klik atau Tekan Saja Foto di Bawah Ini Untuk Pemesanan Langsung

Salawas musim Kuruna naya banyak urang sugih atawa tamasuk kawa disambat sugih alias baduit nang umpat manyumbang, nang kaya manyumbang maskar, rapit tis, pisil, jakit kaya astrunut wan nang lainnya kada tahitung nang manyumbang hin sanitisir, disinpiktan jua sambaku.

"Amun manurut aku pang; manyumbang maskar sampai ma'ungkai duit bararatus juta nintu kada pas. Maraganya kaya maskar nintu kawa dipuruk sakali haja imbah nintu dibuang wara ai," ujar Uhir.

"Satuju liwar aku wan pandapat ikam Hir ai. Maskar nintu haraganya wayah naya kada larang nang kaya pamula'an pas Kuruna manyarang. Wayah naya haraga maskar nintu paling-paling ba'anggar 6 ribu sampai 10 ribu. Artinya haraga 6 ribu sampai 10 ribu nintu sabarata'an warga kawa haja manukar saurang," Ihin manyahuti.

"Imbah dimapa am sabujurnya nang pas wan bagus amun handak manyumbang nintu salain maskar ?" takun Ihad.

Anda perlu mencetak spanduk, baliho, banner, bermacam stiker, bikin ID Card, sablon & lainnya, klik foto ini untuk pesan

Rahatan bubuhan nang ba 3 nintu asik barucau, bangsul Amang Igup ka warung Acil Imai jua. Umpat baduduk jua sidin sambil mamasan kupi hirang wan ruku sabungkus.

"Ayu am ditarus akan pamandiran bubuhan ikam tadi aku handak jua umpat barucau," ujar Amang Igup sambilan malikit ruku.

"Anu haja pang Mang ai masa'alah manyumbang maskar nang bararatus juta ulih bubuhan nang baduit tagal kaya maskar nintu kan sakali puruk haja jua imbah nintu dibuang warai ai," Uhir manjawapi Amang Igup.

"Iya am. Sabujurnya nang kaya maskar nintu warga kada usah disumbang atawa dibari garatis gin kawa manukar saurang wayah naya, haraga maskar kada larang jua lagi, wan nang bajual bahambur dimana haja di wadah kita naya," ujar Amang Igup.

"Amung manurut pian Mang napa kira-kira nang bagus gasan disumbang akan ?" takun Ihad.

Amang Igup manyambut kupi hirang pasanan sidin. Maniup supaya tadingin kawa dihirup.

Manurut Amang Igup, di musim Kuruna naya sabarata'an kakanakan sakulah kada bulih balajar di sakulahan tagal balajar di rumah asing-asingnya pakai intarnit, pakai punsil pintar. Nah, iya amun barata'an saban ikungan kuwitan kakanakan nintu ba'isi punsil pintar atawa kawa tatukar nang haraganya kada kawa disambat murah, baluman ma'isi kuwuta intarnitnya.

"Ada jiran ulun sampat mambawa anaknya umpat balajar di rumah ulun, napa kada ba'isi punsil pintar nintu Mang ai. Jadi anak jiran ulun nintu sama-sama ai balajaran wan anak ulun jua," ujar Uhir.

"Banyak kuwitan kakanakan sakulah nintu kada ba'isian punsil pintar. Ada jua nang kada kawa tatukar amun kada mangumpul akan alias manabung dahulu hanyar kawa tatukar. Ada jua nang ba'isian tagal sabutingannya nintu gin ai pakai kuwitan tapaksa kuwitan bagantian wan anak. Naya baluman musti manukar kuwuta pulang supaya kawa ba'intarnitan. Sarabanya duit tu pang," Amang Igup manjalas akan.

Anda perlu mebel yang ramah di kantong tapi kualitas bagus, klik foto ini untuk pesan



"Kikira napa am manurut pian Mang ?" takun Ihin.

"Amun saran aku pang, bubuhan urang sugih atawa nang baduit nintu mambantu manyumbang nang kaya kumputir atawa punsil pintar gasan bubuhan kakanakan sakulah nang kada mampu kuwitannya baik nang kada kawa atau kada ba'isi punsil pintar, jua atawa nang kada sanggup manukar kuwuta intarnit tatarusan," ujar Amang Igup.

"Nah bagus amun macam nintu. Ulun ada samalam mambaca habar SMAN 1 Sungai Loban tu manyumbang 8 kumputir gasan kakanakan sakulah balajar malalui intarnit. Sakulah nintu bakarjasama wan pamarintahan disa nang manyadia akan mija kursinya, listriknya wan jaringan intarnitnya supaya kakanakan kawa umpat balajar jarak jauh wadahnya di kantur pambakal," Ihad bahabar.

"Han....nang kaya nintu mustinya diumpati amun handak mambantu atawa manyumbang, nyata pas manpa'atnya daripada batukar maskar nang sakali puruk imbah nintu dibuang duit maka am bararatus juta ta'ungkai," ujar Amang Igup.

"Liwar lih Mang banyaknya mambuang duit budas gasan manukar maskar, caka dibari akan ka kita kawa kita sumbangkan ka Acil Imai gasan manambah mudal bawarung supaya kita tanyaman bahutangan amun pas balum baduit gasan mangupi wan gasan baruku, hahahaha..........," Uhir tatawa, Acil Imai am takijat maraga ngaran sidin ta'umpat tasambat. (ISP)


-----------------

*Perhatian : Penulis tak menyediakan terjemahan tulisan di atas, silakan belajar Bahasa Banjar ke tetangga, teman, maupun kenalan Anda yang orang Banjar.