SELAMAT DATANG DAN BERKUNJUNG DI ISP 68 BLOG
Pambakal Tuha Bulik Kampung Minta Pilih Lagi - ISP68

Xticker

Merangkai Kata Merajut Asa

Definition List

   # 

Selasa, 08 September 2020

Pambakal Tuha Bulik Kampung Minta Pilih Lagi

Ampun maap, naya lainan barita tagal tulisan lapas manurut pikiran atawa dadangaran nang manulis. 


-----------------


ilustrasi
"Pambakal tuha babulik ka kampung pulang," Ihat lakun kaya bahabar wan nang ada dudukan di warung Acil Imai di Pasar Ahat.

"Haw, napa habar maka babulik ka kampung jar ?" takun Ihin lakun pina takajut wan handak tahu.


"Amun dadangar habar Pambakal tuha handak umpat pamilihan pambakal pulang di kampung kita naya," sahut Ihat.


"Bah iya am, napa kisahnya tu pambakal tuha maka handak pina babulik pulang jadi pambakal, kada puas haja kah dahulu sudah 2 kali. Sudah tuha damintu baiknya bagana haja gin ai di rumah ma'impu cucu, biar nang anum-anum haja pulang nang jadi pambakal," ujar Uhir.


Bubuhannya mamandir akan parigal pambakal tuha, H. Tukil nang tahabar masih haja kapingin jadi pambakal di kampung, padahal sidin tu sudah jua tarasai 2 kali basambung jadi pambakal.


"Amun manurut aku nang kada pati sakulah naya, nang bagus jadi pambakal di kampung kita ni dangsanaknya pambakal nang imbah pambakal tuha. Waktu si Sani jadi pambakal kita banyak jalan diulah wan dibaiki. Sakulah kada babayaran, wan jua batatamba ka rumah sakit atawa puskismas garatis," ungkai Ihat.



"Nah akur banar aku amun kakanya si Sani nang ngarannya si Sudin nintu nang dipilih jadi pambakal. Urangnya masih anum, wan jua sama baiknya kaya Pambakal Sani," Acil Imai umpat jua basuara.


Rahatan asik bubuhannya barucau bacungul Amang Igup matan muhara kartak manuju warung Acil Imai.


"Pina rami nah warung Acil Imai hari ini. Napa ni pinanya nang sudah dikisah akan ulih bubuhannya naya," tagur Amang Igup.


"Iya am Mang ai nah, kaya naya pang warung halus ni imbah anu tarami imbah anu hawai, bubuhan pian ni pang nang rancak marami akan warung," ujar Acil Imai.


Amang Igup umpat duduk di warung, mamasan kupi hirang wan ruku sabungkus.


"Napa am nang pacang bagus dikisah akan bubuhannya ?" takun Amang Igup.


"Anu Mang ai masa'alah Pambakal Tuha H. Tukil nang handak babulik pulang jadi pambakal di kampung kita naya pang," ungkai Ihat.


"Dimapa am amun manurut pandapat pian Mang ?" takun Uhir.


Amang Igup manyambut kupi hirang pasanan sidin, imbah nintu sidin malikit ruku wan ma'ambul akan kukus.


"Sudah gin ai amun kaya nintu tinggal warga kita haja lagi nang bapikir mamilih siapa pacang bakal pambakal. Amun manurut aku pang baiknya mamilih nang lain haja daripada Pambakal Tuha H. Tukil nintu," jawap Amang Igup.


"Haw kanapa bisa kaya itu Mang ?" takun Ihin.


"H. Tukil nintu lainan kaya H. Tukil dahul wayah jadi pambakal. Sidin nintu handak babulik jadi pambakal nintu maraga ada nang manyuruh haja kada kahandak sidin saurang, kada kahandak hati sidin, kada ihlas," ujar Amang Igup.


"Akayah ai damintu kah kisahnya Mang," sahut Uhir.


"Ba'arti H. Tukil nintu kapantingannya gasan urang lain nang manyuruh kada bujur-bujur handak mambangun kampung kita naya, ulun pasti kada hakun mamilih sidin amun kaya nintu," ujar Ihin.


"Pinanya nang kaya nintu pang nang aku dadangaran. Wan jua kampung kita naya kada kaya dahulu lagi. Kada banyak lagi nang kawa dijadikan duit gasan kasugihan, parak habis dikakat bubuhan nang baduit," ujar Amang Igup.


"Imbah pang bagusnya dimapa am Mang, siapa kira-kira manurut pian nang patut jadi pambakal kita di kampung naya ?" takun Ihat.


"Amun kahandak aku nang tuha naya baiknya bubuhan nang anum-anum pang tatarusan nang jadi pambakal jangan urang tuha, nang tuha cukup mambimbing haja manasihati supaya jangan tasalah," jawap Amang Igup.


"Aku akur wan pandapat Amang Igup. Pambakal nintu baik bubuhan nang anum-anum, masih kuat wan jaranih bapikir. Si Sudin dangsanak Pambakal Sani tu pinanya patut banar jadi pambakal, urangnya masih anum wan baikan jua," umpat jua Acil Imai manyahut matan dalam warung.


"Amun damintu kisahnya kita padahi warga barataan jangan mamilih Pambakal Tuha H. Tukil bila sidin mancalun. Amun si Sudin nang mancalun kita barataan mamilih si Sudin haja, kaya apa akur kah ?" takun Ihat.


"Akur........!!!" sahut barataan nang ada di warung Acil Imai taumpat jua ampun warung.


"Wan warga kita pasti manang !" Ihat ma'angkat tangan bakuciak, nang ada umpat jua ma'angkat tangan ma'umpati parigal Ihat. (ISP)
--------------------------------------

*Perhatian : Penulis tak menyediakan terjemahan tulisan di atas, silakan belajar Bahasa Banjar ke tetangga, teman, maupun kenalan Anda yang orang Banjar.