PLN; Parusahaan Lilin Nagara

Hanyar am Julak Madi handak manyuap nasi ka muntung, listrik di rumah sidin pajah bakajut. “Bungul, tambuk banar bubuhan PLN ni kada tahu urang rahatan handak makan, pajah tarus bakajut,” Julak Madi manyumpah, badiri bajalan sambil bahahar ka ampah nang taliat tarang.

Di kamar muka, Hadran, cucu Julak Madi jua kada mau kalah bakuciak hangkui, “PLN gila…….hilang am samuaan gawianku di kumputir, kada sampat manyimpan !”

Bilang handak hari-hari listrik pajah haja di kampung julak Madi. Ujar urang kampung; kaya minum ubat tatamba haja, 3 - 4 kali sahari, kada tahu siang, kada tahu malam, pajah haja tarus.

Padahal hari-hari jua matan kampung Julak Madi, urang ba’angkut batubara wan mangirim kaluar dairah. Ujar batubara itu gasan PLTU, manyala akan listrik.

“Bujur haja batubara kita nintu gasan manyala akan listrik, tapi disana gasan di banua urang, di pulau Jawa sana,” ujar Rudi nang angguta LSM alias Lambaga Sawadaya Masarakat.
“Ih nyaman di banua urang ngarannya pada di banua kita amun kaya nintu parigalnya,” Julak Madi manyahuti.
“Makanya am bubuhan ampat Gubarnur di banua kita naya suah ma'ancam handak manangati pangiriman batubara kaluar dairah amun listrik di wadah kita naya aur mati tarus,” jar Rudi manarang akan.
“Bujur tu, aku mandukung banar amun bubuhan Gubarnur itu basuara kaya itu. Biar haja kita sama pada bakadap. Labih baik batubara di wadah kita ini dipakai saurang haja, kita baulah PLTU saurang haja, duitnya bakumpulan sabaraan matan urang banua,” Julak Madi maginannya basamangat imbah mandangar Rudi bapandir.

Pamandiran Julak Madi wan Rudi di warung Acil Irum itu rupanya maulah Kai Asul basinggah jua ka warung.
“Nangapa dipandir akan pina bapicik banar nih ?” takun Kai Asul sambil duduk di higa Julak Madi.
“Masa’alah listrik kita nang pajah-pajah ni pang kai ai,” Rudi manyahuti.
“uuuu…….damintu kah. Unda dangar bubuhan mahasiswa kita nang tagabung di Purum Paduli Banua, tulakan ka Jakarta, mandimu PLN, wan bubuhannya jua handak mangumpul akan duit pacah saribu tun baratnya gasan paduli wan listrik,” Kai Asul maungkai pangatahuan sidin.
“Wah, matan mana pian jadi tahu marina ?” Julak Madi batakun handak tahu.
“Makanya am kita itu musti bapintar jua kaya bubuhan kakanakan nang anum-anum, aku mambaca barita di intarnit,” Kai Asul ba’agak.
“Nah ini hanyar ngarannya kai ulun, kada katinggalan tiknulugi,” Rudi ma’ambung Kai Asul, nang diambung maka am muha tambah kaliatan kalirut kahimungan.

Sabab listrik bamati-mati tarus bakajutan, urang di kampung Julak Madi garunuman, garunum muar wan sarik ka bubuhan PLN. Napang banyak paralatan iliktrunik nang kaya tipi, kulkas, kipas angin, macam-macam, jadi lakas banar rusakan. Imbah itu bayar listrik saban bulannya jua sagin balarang.
“PLN itu nang bagus kapanjangannya; Parusahaan Lilin Nagara, napang imbah listrik pajah kita malikit ka lilin,” ujar Julak Madi masam muha.

*Maaf, untuk kali ini saya belum sempat translate ke bahasa Indonesia apalagi ke bahasa Inggris.