Ibukuta Nagara Ba'andah di Kalimantan

courtesy : kontan

"Dimapa am sudah kisah pacang ibukuta nagara handak diandak kamana, ada haja kah habarnya ?" kai Akup manakuni bubuhannya nang rahat mangupi di warung Acil Ijum nang ba'andak di buncu pasar ahat.

"Ada haja pang tadangar habarnya kai ai. Ujar habar di tipi ibukuta nagara nintu handak dialih ka Kalimantan naya tagal kada disambat akan dimana-mana," sahut Amat Waluh sambilan mambibit gaguduh.

"Pinanya maun masa'alah jadi tu jadi haja pang tapindah ibukuta nintu. Bisa haja andakannya di Gunung Mas di Kalteng, Tanah Bumbu Kalsel, atawa di Tenggarong Kaltim," ujar Amang Bakri manyahuti jua.

"Nangapa garang kai pian jadi manakun akan masa'alah ba'alih ibukuta, banyak baisian tanah kah pian pacangan dijual kaina ?" Amat Tingil batakun.

"Kadanya nang kaya itu pang. Kalu pina kutapak muhamu tu lawan capal ni Mat ai, nang kaya aku Tuan Takur ha banyak baisian tanah," Kai Akup sangit ditakuni Amat Tingil.

Balalu pancat Amat Tingil imbah dihingkau Kai Akup, pura-pura ai Amat Tingil mangulai bungkus ruku, hehehe........han tiya.

"Pian akur haja lah Kai amun ibukuta nagara ba'alih wan ba'andah di wadah kita naya ?" takun Amang Bakri.

"Akur haja pang asal jangan di wadah kita naya, maksutku kada di kampung kita naya. Biar haja ba'andah di Kaltim sana haja," ujar Kai Akup.

"Hau kanapa maka pian katuju ka Kaltim sana kada di wadah kita ni haja di Kalsel atawa di Kalteng Kai ?" takun Amat Waluh.

"Biar kujawap hulu kanapa di Kalteng, maraganya di Kalteng nintu amun misal di Gunung Mas tulak ka palabuhan sing jauhan amun kada ka Sampit atawa ka Pangkalanbun," jawab Kai Akup.

"Imbah pang kanapa pian kada akur manun di kampung kita haja pang ?" Utuh Kangkung bagasut umpat jua batakun.

"Aku kada akur amun di wadah kita ni satu partama Basa Banjar nang kita basa'akan saban hari wan jua diumpati ulih suku lain kaina pacang kalah wan basa nang dibawa urang datang luar nang manyarang ibukuta nagara. Amun Basa Banjar kada tapakai lagi siapa kaina nang mambaca kisah kita naya disiya," ujar Kai Akup.

"Nang itu haja lah Kai ?" takun Amang Bakri.

"Nang kadua, bubuhan nang kaya kita urang jaba wan kada badahi naya pacang ta kapinggir nang kaya urang Batawi. Nang nyaman tu kaina nang sugih wan banyak baisian tanah alias tuan takur nang bahimat untung ganal bajual tanah ka bubuhan pandatang nang manyarang ibukuta nagara," Kai Akup manjalas akan.

"Nang lainnya pang Kai adakah lagi ?" takun Amat Waluh.

"Nah ta ahir, bila ibukuta nagara nintu diandak atawa ba'andah di Kaltim, mata banua kita naya masih taparak jua ka ibukuta. Nang iyanya nintu kampung atawa banua kita ini tatap ligar amun kada jadi ibukuta nagara. Gamah am di lain haja nang pacang rusak ulih kahidupan ibukuta kaya di Jakarta asal di wadah kita kada," Kai Akup mayakin akan bubuhannya.

"Ayu ai amun damintu kita barata'an ma'asi wan nang tuha asal banyu wan makanan kita ditahuri sidin, hehehehe........" ujar Amat Waluh.

"Dasar waluh bujuran ikam ni Mat. Ayuha kutahuri barata'an, tadi aku imbah dapat rajaki dibari H. Idrak kahujungan indin bajual tanah," ujar Kai Akup manyurung duit ka Acil Ijum.


Bulikan............