Bantas Situ Sabu Bahimat - ISP68

Xticker

Merangkai Kata Merajut Asa

Klik atau Tekan Saja Foto di Bawah Ini Untuk Pemesanan Langsung
Klik atau Tekan Saja Foto di Bawah Ini Untuk Pemesanan Langsung

Sabtu, 08 Agustus 2020

Bantas Situ Sabu Bahimat


minta ijin ampun tribunnews
"Liwar pamakan Sabu pinanya urang di Banua kita Naya lah," ujar Ihad bakajutan bapandir rahat dudukan di warung Acil Imai.

"Haw....! Napa ti maka ta'ucap macam nintu. Ikam sama haja ma'anggap urang banua kita banyak nang katuju Mauk," sahut Ihin pina muha sarik.

"Sudah kada usah bahualan, santai haja muha ikam. Ihad nintu pinanya handak bakisah atawa bahabar wan kita nang inya tahu tagal kita baluman tahu, lanjut Had," Uhir manyahuti.

Ihad balalu bakisah parigal 4 ikung nang ditangkap pulisi maraga mambawa Sabu liwar banyak; labih 200 kilu banyaknya ditambah pil iniks nang kawa ma'ulah urang tariping; banyaknya parak 54 ribu bigi.

"Dimana tu bubuhannya ditangkap, siapa nang manangkap ?" takun Uhir.

"Amun mambaca di madia unlain pang bubuhan birunak nintu ditangkap di Banjarmasin, nang manangkap bubuhan Polda Kalsel bakarjasama wan Polda Metro Jaya," jawap Ihad. 

"Kada jadi sugih amun tatangkap pulisi tu," ujar Ihin takarinyum.

"Napa ti bajualan Sabu nintu bisa ma'ulah sugih kah ?" Acil Imai umpat jua handak tahu.

Baluman sampat dijawap takunan Acil Imai balalu Amang Igup datang bagabung jua ka warung mamasan kupi hirang.

"Napa sudah nang dipandir akan tadi ?" takun Amang Igup sambil ma'isap ruku.

"Tadi pang si Ihad mang ai bakisah parigal bubuhannya ba 4 tatangkap mambawa Sabu labih 200 kilu wan pil iniks parak 54 ribu bigi," Ihin bapadah ka Amang Igup.

"Iyakah. Aku ada jua pang dadangaran, ujar datang matan Kaltara dibawa ulih jaringan Malaysia ka banua kita," ujar Amang Igup.

"Dimapa am amun manurut pandapat pian mang sual Sabu wan pil iniks sing banyakan nintu ?" takun Ihad.

"Amun aku ni biasa haja pang sualnya aku kada mambantas nang kaya nintu, parai, mahabisi duit baik batukar baras, hahaha......," Amang Igup mangalangkang tatawa.

"Kada kaya nintu pang mang ai. Bubuhan birunak nintu katuju banar babawa barang nang kaya itu ka banua kita, nang kaya bubuhan di wadah kita baduit barataan wan pambantas barang kaya nintu, mambari muar........," Ihin manyahuti.

"Iya am tu. Samantangan di banua kita naya pang banyak tambang batu harang makanya dikira sugih baduitan barataan wan katuju baramian babuang duit nukari Sabu wan pil iniks nintu," ujar Amang Igup.

"Pinanya bubuhan birunak nintu biar dihukum akan bahimat wan dimati'i gin ai pina kada hintat-hintat, napa amun haraga Sabu nintu larang pada amas, lakas sugih amun kada tahaga wan tatangkap pulisi," ujar Uhir.

"Uuuuu......kaya nintu kah. Hanyar am aku tahu bajualan Sabu nintu lakas ma'ulah sugih, aku maka am batahun-tahun bajualan wadai wan banyu kupi balum haja sugih," sahut Acil Imai matan dalam warung. (ISP)

-----------------

*Perhatian : Penulis tak menyediakan terjemahan tulisan di atas, silakan belajar Bahasa Banjar ke tetangga, teman, maupun kenalan Anda yang orang Banjar.


Tidak ada komentar:

Posting Komentar

Komentar singkat & padat.
Tak bernuansa SARA.
Tak membully.